आज माझ्या बागेत…

सळ सळ सळ प्राजक्तामधुनी

उन म्हणाले सोनसळी

या उठा फुलांनो खेळू आजही

रोजसारखी पळापळी

पाकळीची उमलून पापणी 

हळूच एकदा पहा तरी

चौफेर फाकले रश्मिकर,

लोपली नभी अन् विभावरी

रवि किरणांनी नभा व्यापीले

गुलबक्षी तरी निजलेली

वेलीवरूनी टकमक बघती

जुई सायली आणि चमेली

गवतातुनी मग नाचत आली

नाजुक पिवळी पाकोळी

चकित होऊनी म्हणे कुसुमांनो

पेंग कशास्तव यावेळी

सवंगड्यांची करीत प्रतीक्षा

कधीचा जागा पारिजात हा

सकाळ मोहक जतन कराया

हृदयामध्ये, सुचवी पहा

अन् आज अचानक कुठून कशी,

शिंपीण आली बागेत

भिरभिर भिरभिर फिरूनी शोधते

काही पाना-पानात

उठा कुसुमांनो बोला डोला,

गंध पसरवा अलवार

पिलास्तव ती बांधील घरटे

करू द्या तिज सुखसंचार

आरती मांजरेकर

३ ऑक्टोबर २०२३